Iimbongo zakwaSkhosana – Tlharini Khungwako Ngumaphepha ngotjani abanye baphepha ngemithangala Yikubel’ezihlengako Eyazihlenga hlangana noMhlotjheni noWuba Sikhwiri sawa ngobuso Iinzalo zikhangelana Zikhangelana uMusi noMhlanga UMhlanga komo kaNanasi Lijali NguJal’akoNdlovu Ngumathandana ngenjobo Mhlazana kungananjobo kuyaliwa NguTlharini wako Myengwa Ngumatlhariya ipoto nangendlala Nakungaphandle iphekel’abantwana Nakungendlini iphekel’abayeni NguMdlharhari kaTlharini Umthonjana ongehla kweNdubazi Indoda ingawusela ibhodla isibhorho Umfazi angawusela uyabhinjidelwa Sikhosana sikaMusi kaMhlanga Kunzakogwazana Eyagwaza ngazo zombili kwanga ithapha udaka  kanti ithapha iimbombo yamany’amadoda.