Thombeni, Tjhigwana, Gegana, Yangalala Sigadanga ngaboya entabeni YeMabulembu Ndebele Makonkwana Uphambana nekomo adle Umalusi.   Sigada sikaNdlongwana Esigade emzileni Hlangana namaKandla NamaThombeni.   Tjhigwana Budogwa, Wagega ngaphasi kweentaba ezimbili Ngaphasi koWuba noMhlopeni. Walala ngaphasi komuthi, Umuthi wavuka uthombile. Liqina elajama ngomlenze owodwa emrhuleni, Kwahlangana amaKandla namaThombeni. Ngabakhe endleleni bakhele abaphambukeli. Indlovu yabhula ngomboko, yabhula ngetjhoba, Yagadanga ngeqatha kwaThombeni emasangweni, Abafazi nabatwana babona ngamadoda ukuyaluzela.   Siphuma kwaNomamba Kwamfazi omatshila njengendoda. Msana gijima utjele uLenjani kaNdzundza Ufike uthi, esinje ngesinjani. uLenjana kaNdzundza wathi, “buzimba buyokulanda ipofu edakeni.”   Sithe sisebuzimbeni lavika iqina elimavuko mabi, Elagadanga ngomlenze munye Hlangana namaNtungwa namaThombeni, abaNtungwa belibona bathi, “manikelela,” thina maThomeni sathi “yikosi yekhethu yamaThombeni.” Ukhithi ngesizibeni avuke isilwane, Kwakumhla siba maThombeni.   Wavula uLikhotho wabetha uSoMenzelwa ilihlo, uSoMenzelwa naye wabetha uLikhoth’ ilihlo.   Likhotho iinyoni zekhaya ziyalila Zithi, “Likhotho hlaba sidle.” Mzukwana kulila ikomo yoSoMenzelwa Ilila isisuthu ithi, “Yo! Yo!” Yezwiwa nguNolwandle umkhwekazakhe Wathi ikomo ngeyomyeni oza nendaba.   Umyeni wathi bayeni besiza ngeenyembezi Wathi, “mma, ungalila ngile ngeemkhontwami,” Useca emide kemncani uyazikhambela.   Khebe wathi uSoGobile, uSoMenzelwa wenzani ngemva kwendlu koMnyangwana? Sikwazi unganamahlaya. Thombeni! Tjhigwana! Gegana! Ndlov’obuthwa!