Mzwezi wakoMabele, Mdlazabanye, Mdlazababonako, Mlangatshakaza, kungadliwa zakhe uyajabajaba. Sphofu Mdlwayile, Hluza leya naleya ihluz' umgowana. Phungula uyasindrwa usindrwa makghawu, Betha leya naleya ngombana ayihluzi litho ihluzu mghowana, Ngeyekhethu ke leyo, ngeyakwaPondro masehlana, NguPondro mahlikihla njengotshani benkomo, Zona zithi zibuhlikihla zibe zibuhlikilizaza, uPondro sisilwa ngomnyama, Yikakha yekhethu eyala ukufa, namabala ezinye inkakha, kantri zona zifa namabalazo, Ngumazumazumana owazumana kwaze kwasa, Ngumathandrana ngenjobo nakungenanjobo kuyaliwa. Gijima kakha yekhethu uyobikela amaghagha amadala aboSomtshoghweni bona aboSomtshabi bavela ngakwaPondro. Bathi: "Mtrwana uboneni ngemva kwendlu yakwaPondro?" Wathi: " Ngibone imbuzi izele amaphahla." Bathi: " Asimaphahla lighubo lakwenu" Abanye bathi: " Ngukhozi wakokhozi" Mina ngithi: " NguMzwezi wakoMabuyelela." NguMzwezi-ke loyo, nguMdlazabanye, nguMdlazababonako, nguSomtjoghweni, nguMlangatshakaza, ngumaVulakukhanye. ngumaVula kuvaliwe njengentshengo zabeZimu ezavela kuZimu omuhle, iKakaramba yenkakaramba ePhasini loke. Vuka Mzwezi, vuka bakubone, vuka Mlangatshakaza.